Janúarviðburður Upplits í Félagsheimilinu á Flúðum 19. janúar: Sagnakvöld með tónlistarívafi

Sigmar Sigþórsson Aðsendar fréttir

 

Fréttatilkynning

 

Janúarviðburður Upplits í Félagsheimilinu á Flúðum fimmtudagskvöldið 19. janúar

„Mér er líka skemmt“
Sagnakvöld með tónlistarívafi

 

 

9. janúar 2012

 

„Mér er líka skemmt“ er yfirskrift sagnakvölds Upplits í Félagsheimilinu á Flúðum fimmtudagskvöldið 19. janúar kl. 20.30. Þá mun sagnamaðurinn Jóhannes Sigmundsson í Syðra-Langholti segja skemmtisögur af eftirminnilegu fólki, lífs og liðnu – og undanskilur hann þar ekki sjálfan sig.

 

Jóhannes rifjar upp orð og atvik úr lífi fólks í uppsveitum Árnessýslu á borð við Brynjólf Melsteð, Sigurð Greipsson, Imbu Sveins, Sigurð í Hvítárholti, sr. Sveinbjörn í Hruna, Böðvar Magnússon á Laugarvatni og marga fleiri. Gestur Jóhannesar á sagnakvöldinu verður Sigurður Sigurðarson dýralæknir. Hann les upp úr nýútkominni ævisögu sinni, þar sem m.a. koma við sögu nokkrar af þeim persónum sem Jóhannes segir frá – og svo er aldrei að vita nema Sigurður kveði nokkrar rímnastemmur.

 

Loks leika tvær ungar stúlkur, þær Jóhanna Rut Gunnarsdóttir og Ninna Ýr Sigurðardóttir, saman á fiðlu og píanó. Þær spila einnig einnig hvor í sínu lagi, Jóhanna Rut á fiðlu og Ninna Ýr á píanó.

 

Aðgangur er ókeypis og allir velkomnir!