Listasafn Árnesinga – Leiðsögn með Guðrúnu

Lilja Helgadóttir Nýjar fréttir

Verulegar

Brynhildur Þorgeirsdóttir · Guðrún Tryggvadóttir

Leiðsögn með Guðrúnu 8. október kl. 15:00

 

Sunnudaginn 8. október kl. 15 mun Guðrún Tryggvadóttir segja frá verkum sínum á  sýningunni Verulegar, Brynhildur Þorgeirsdóttir · Guðrún Tryggvadóttir, sem nýverið var opnuð í Listasafni Árnesinga í Hveragerði.

Á sýningunni er sjónum beint að viðamiklum listferli Brynhildar Þorgeirsdóttur og Guðrúnar Tryggvadóttur sem spannar nær fjóra áratugi. Þar eru kynntar tvær öflugar konur sem gerðu sig gildandi á vettvangi myndlistar í kjölfar umbrotatíma áttunda áratugs síðustu aldar og sem enn eru að vekja eftirtekt með verkum sínum.
Verk þeirra sáust fyrst opinberlega saman á listahátíðinni Gullströndin andar snemma árs 1983; listahátíð sem mótuð var af ungum listamönnum og vakti verulega athygli. Nú tæpum þrjátíu og fimm árum síðar gefst tækifæri til þess að fá innsýn í það sem þær voru að fást við þá og bera það saman við það sem þær eru að fást við í dag. Á sýningunni í Listasafni Árnesinga má sjá verk frá níunda og tíunda áratugnum en flest verkanna eru unnin á síðustu þremur árum. Brynhildur er enn að móta skúlptúra og Guðrún að fást við málverkið á hugmyndafræðilegum grunni. Málverk hennar eru mjög persónuleg og snúast um það að myndgera tímann og efnið og tengsl kynslóða og alheimsins.
Guðrún nam fyrst við Myndlista- og handíðaskóla Íslands en hélt síðan til Frakklands og Þýskalands í framhaldsnám. Hún hefur haldið fjölda sýninga, hér heima, í Evrópu og Bandaríkjun og hlotið fjölda viðurkenninga, bæði fyrir myndlist sína og fyrir störf sin á sviði nýsköpunar en hún hefur verið frumkvöðull á ýmsum sviðum; stofnað og rekið myndlistarskóla og listræna hönnunarstofu sem hún rak í Þýskalandi og hér heima um árabil. Guðrún stofnaði einnig og rak umhverfisvefinn Náttúran.is um 10 ára skeið en hún hefur verið í framvarðasveit fyrir umhverfisfræðslu á Íslandi frá því að hún flutti aftur til landsins árið 2000.
Á sunnudaginn gefst tilvalið tækifæri fyrir gesti að kynnast verkum Guðrúnar og starfsaðferðum í samtali við listamanninn.
Sýningin mun standa til og með 17. desember. Safnið er opið fimmtudaga til sunnudaga kl. 12-18. Aðgangur að safninu er ókeypis og allir velkomnir – líka á leiðsögnina/listamannsspjallið.