Matarsmiðja á Flúðum – viljayfirlýsing undirrituð

Steinunn Ósk Kolbeinsdóttir Nýjar fréttir

Undirskrift_og_Hvtrbr.27.5.2010_010

Viljayfirlýsing um að setja á stofn matarsmiðju á Flúðum var undirrituð í gær fimmtudag.

Síðustu misseri hefur verið unnið að undirbúningi þess að setja á stofn matarsmiðju í uppsveitum Árnessýslu sem verður miðstöð fyrir vöruþróun og fullvinnslu á grænmeti og til að efla fag- og háskólamenntun á svæðinu með kennslu og rannsóknum. Ráðinn verður starfsmaður, húsnæði leigt á Flúðum og komið upp aðstöðu. Hugmyndin er að bjóða frumkvöðlum og smáframleiðendum upp á sérfræðiaðstoð til að þróa sínar vörur án þess að þurfa að leggja út í mikinn kostnað við aðstöðu, búnað og starfsleyfi á meðan verið er að koma vörum á markað.

Atvinnuþróunarfélag Suðurlands, Háskólafélag Suðurlands, Hrunamannahreppur, Bláskógarbyggð, Skeiða og Gnúpverjahreppur, Grímsnes og Grafningshreppur, garðyrkjumenn, Matís og Háskóli Íslands hafa unnið að undirbúningi matarsmiðjunnar.

Vaxtarsamningur Suðurlands styrkti Matís við undirbúnings Matarsmiðjunnar. Í vor sendu samstarfsaðilarnir inn nýja umsókn til Vaxtarsamnings Suðurlands um þróun á matarsmiðjunni.

Stofnað verður sérstakt félag um rekstur matarsmiðjunnar á Flúðum. Samstarfsaðilar munu í sameiningu vinna að því að tryggja framgang verkefnisins svo hægt verði að nýta aðstöðuna til þróunarstarfs, kennslu, námskeiðahalds og tilraunastarfsemi.