Hrunamannahreppur

Flúðir er vaxandi þéttbýliskjarni og vinsæll staður að heimsækja. Fjölbreytt þjónusta og afþreying er í boði á Flúðum og næsta nágrenni í sveitinni. Fyrir þá sem vilja gista bjóðast fjölbreyttir gistimöguleikar sem henta öllum; hótel, gistiheimili, bændagisting, heimagisting, og tjaldsvæði. Veitingastaðir eru einnig fjölbreyttir svo allir geta valið það sem þeim finnst best. Farmers Bistro (Flúðasveppir), Minilik, Hótel Hill og Kaffisel, allir með sína sérstöðu og flestir leggja áherslu á hráefni úr nærumhverfi. Afþreying er mjög fjölbreytt, fyrir alla aldurshópa og áhugasvið flestra. Sundlaugin Flúðum, Gamla laugin (Secret Lagoon) og Hrunalaug (Hidden lagoon) eru skemmtilegir baðstaðir. Selsvöllur 18 holu golfvöllur, Markavöllur fótboltagolfvöllur, frisbígolf í Lækjargarðinum, hestaferðir í Syðra-Langholti, Samansafnið á bænum Sólheimum og Hús minninganna á Flúðum. Gönguleiðir, fjöll til að klífa og fjölbreyttir útivistarmöguleikar allt um kring. Jarðhiti er mikill á svæðinu, óþrjótandi uppspretta af heitu vatni og landið ákjósanlegt til ræktunar. Fjöldi garðyrkjubýla er í sveitinni og auðvelt er að kaupa sér hollar og góðar matvörur beint frá býli t.d. í Litlu bændabúðinni. Flúðir eru miðsvæðis á Suðurlandi og stutt í margar helstu náttúruperlur þjóðarinnar, Brúarhlöð, Gullfoss, Geysir og Þjórsárdalur eru til dæmis innan seilingar. Á sumrin er mikil veðursæld og oft háar tölur á hitamælunum á Flúðum.